Sunday, October 18, 2009

كوكتيل عالماشي

اوكي صارلي مليون ساعة اكتب وماخذ لابتوبي التحفة القهوة وحالتي حالة وانا بنص كتاباتي اللابتوب يخرف ولاراضي يطلع صور ولاني مزاجي درجة اولى لاعت جبدي وعصبت وماراح اكتب وصج صج متنرفز فا قلت اكتب كوكتيل وبدون صورة كمان كله من جهازي الزفت اوووووووووف

اوكي بعور روسكم، جهازي الحلو العسل الماك مافيه عربي فا ماقدر اكتب فيه، جهازي التحفة العربي القديم اللي لو هزيته شوي يخرب قرر اليوم انه مايطلع الصور، مافي الا حل واحد وهو ياحلوين اني اروح احط عربي لجهازي الماك، اوكي اهو فيه عربي بس لازم احط الاحرف العربية عالكيبورد، اولا ماكنت راضي اسويها لاني ماحب احرف عربية على كيبورد ماك، نفس لو تقول بريتني سبيرز لابسة نقاب، مو لايق! وبعدين المشكلة الاحرف العربية مكانها عالماك غير مكانها عالويندوز، ادري بتقولون احنا شكو الحين؟ كيفي بلوجي وانا حر :(، عالعموم بروح بكره اسويه، ولا تبوني احول البلوج انجلش؟؟؟
............

حبايبي اللي ضايفيني على البلاك بيري ماسنجر، صج صج مستانس فيهم ويمكن اهم مايدرون انهم خلو ايامي احلا، والحلو فيهم انه كل واحد له شخصية غير سواء بنات او شباب، اللي يكلمني مرة بالشهر، واللي تزعل علطول لووول، واللي يكلمني كل دقيقة ماياخذ بريك من اول مايقوم ليما ينام، واللي ذبحني برودكاست، كلكم احبكم، وترى لو طولت بالرد مرات مو معناها اني مو مهتم، لو مو مهتم كان حذفتكم عادي قليل ادب لوووول، بس يعني مو دايما بحط التلفون بويهي واكتب وخصوصا اني ماحب استخدم الموبايل اذا معاي احد الا اذا كان ممل طبعا :D
............

اوه صج شخبار اللي نفس برجي؟ مادري فجأة تذكرتك :) هاي شلونك؟ عسى شيشتك زينة؟ عادي انا قرقه كيفي وقررت اسولف معاك في البوست مالي :)
............

اوووه قلتلكم اني رديت اكلم مستر حنه؟ هاهاها التفاصيل بعدين
............

وقلتلكم انه
Mr.T
رد يكلمني؟ كمان التفاصيل بعدين :D
............

انا صرت البس نظارة طبية!!! كان يصير فيني صداع دايما وطلع عندي على قولتهم انحراف بالقرنية (حتى قرنيتي منحرفة)
المهم قالولي مايصير عدسات ولازم نظارة، طبعا ضعف النظر عندي بسيط يعني عادي بدون نظارة بس لازم استخدمها عشان مايصير فيني الصداع الغبي اللي يحوشني، ااااااه احس وزن زايد على ويهي اف مليت :(
............

سمعتوا عن قرار اغلاق المقاهي بعد الساعة 12 وبعدين صارت بعد 1 بالليل؟ يعني اكتشفوا انه في قهاوي مش مضبوطة فا قررو يصكرون كل الدولة يعني بالليل تصير مدينة اشباح؟ انا مادري منو العبقري اللي ياخذ هالقرارات؟ المشكلة يسمعوا كلام نائب متخلف مثل الهايف اللي اسمو هايف المطيري!!! هذا لو عليه يحول الدولة الى افغانستان، الحلو انه الناس صارت تشيش بالشوارع تعبير عن الاحتجاج، يعني لو في غلط عاقبوا القهوة اللي سوت الغلط مو تسكرون الدنيا كلها، والمشكلة محد سكر بس طفو الاضاءة والناس قاعدة، اتمنى من كل قلبي حل مجلس الامة الكويتي للابد، بدون المجلس الكويت راح تصير افضل دولة، بالكويت الحكومة متقدمة بمراحل عن المجلس المنتخب اللي يحاول يسكر الدولة كلها ويخليها مدينة اشباح
............

فدييييييييييت الدمام والخبر والظهران وه وه بس صارو الحين من المدن المفضلة خلاص حبيتهم وحبيت قهوة الفوازية لووووول عجيبة مافيها ولا شي الا تفاحتين وكل شي مو موجود يعني زين في حمام، اول شي حسيت اني بجحيم بس شنو هالناس اللي فيها؟؟ احم احم احلا شباب يعني رحت اماكن راقية اشكال غلط، رحت هالمكان الغريب وكل اللي فيه واااو، يلا نفس الملكي مكان عادي ونصهم حلوين
............

ليش نلف دول مجلس التعاون الخليجي كله ونادرا نشوف سيارة شرطة ومع هذا نادرا نشوف حوادث سيارات، وبالكويت تشوف سيارات الشرطة اكثر من الشعب ومع هذا بكل شارع في حادث وياريت الشارع ماشي وكلووو داخل في كلووو
............

بالسعودية تم افتتاح جامعة الملك عبدالله للعلوم والتقنية، وهي اول جامعة من نوعها في الشرق الاوسط، كان حفل افتتاحها اكثر من رائع، هالجامعة مافيها بكالوريوس، من ماجستير وفوق وكلها في تخصصات نادره ولا تقبل الا المبدعين واصحاب العقول، وفي دبي تم افتتاح مشروع حيوي وهو مترو دبي اللي راح يساهم في تخفيف الزحمة، والبحرين خطاها سريع في ان تصبح المركز المالي في المنطقة، قطر كل يوم شكلها يتغير بسبب التطور الهائل فيها، وفي الكويت النقاش مستمر والصراخ مستمر هل يجب ان ترتدي رولا دشتي واسيل العوضي الحجاب ام لا!!! وتلوموني لما اقول يارب ينحل المجلس؟؟؟
............

انا مو عارف ليش الناس تلعب بالنار؟؟ يعني اكيد سمعتو عن مشكلة البطاقة بين السعودية والامارات، الامارات حاطة جزء من اراضي السعودية ضمن خريطة الامارات على البطاقة، وتم ابلاغهم من السلطات السعودية انه يجب تعديلها لكن في الامارات قررو يكملو فيها، ويقولون مفروض هذه اراضينا، طيب انا عن نفسي احب ادور واشوف دايما منو الصح، طلع في اتفاقية من الاساس بينهم من سنة 1974 وموثقة من الامم المتحدة يعني المفروض مافي مشكلة، بالامارات يقولون احنا انظلمنا في الاتفاقية، طيب يا حبايب قلبي وخصوصا اني من اشد عشاق الامارات، مو عشان طلع فيها نفط يعني انظلمتو، طيب لو كان العكس وطلع بمكان ثاني نفط ترضون السعودية تقول غيروا الاتفاقية؟ وبعدين انتو وقعتو خلاص، لو كل واحد بقول يلا نرجع ايام زمان راح تتغير خارطة المنطقة كلها، ايام ماكان الخليج عبارة عن ثلاث دول فقط، مشكلتي اتنرفز لما اشوف اي خلاف خليجي، كلكم ست دول ومسوين زحمة، هذا لو كنتو 12 ولا 20 شنو بصير؟؟؟
............

انا اليوم صاير سياسي مادري اشفيني، المهم شفتو خطاب القذافي بالامم المتحدة؟ ماكان ناقص الا يمسك عصا ويطق فيها الموجودين لووووول، الله يعين شعبه عليه
............

باليمن السعيد جدا حروب وقتال بشكل يومي وفوق هذا يبون بطولة الخليج تصير فيها، اي خير انشالله
............

على طاري الكرة، مبروك لمنتخب البحرين عاللعب الرائع والف رحمة ونور على الفقيد المنتخب السعودي، عمر المنتخب السعودي ماراح يتطور مادام ابو الخطط العلمية المدروسة قاعد بمكانه، يا اخي استقيل قاعد على قلوبنا روووح قرفتنا ياشيخ، الله يرحمك يافيصل بن فهد
............

ومبرووووك المستوى الاكثر من رائع لمنتخب الامارات بكاس العالم للشباب، والله انهم يشرفوا ويرفعوا الراس فديت قلوبهم واحد واحد
............

وكمان مبروك لنادي الهلال تتويجه بنادي القرن الاسيوي، صحيح اني اتحادي بس احب الهلال كمان
............

اوووه اكيد راح تسألوني عن منتخب الكويت؟ الحمدلله على كل حال وقدر الله وماشاء فعل وهذه حال الدنيا، الموت مكتوب عالكل
............

هذا صج اكتل كوكتيل كتولته ببلوجي، بس خلاص بكمل شيشتي اشوفكم الاسبوع الياي
............

اوكي حلو وتوني ابي اكبر الاحرف مال البوست نفس ما اسوي كل مرة، مو راضي يصير، انا بخليكم الحين وراح اكسر لابتوبي، سامحوني راح تطلع عيونكم وانتو تقرو من الخط الصغير بس شسوي؟
eh2 eh2 :'(

7 comments:

غريب said...

قاعد اقرا وما داري وين بقرا بستغرب منو هذا

بست عجيب فيه من كل بستان زهرة صج كوكتيل


على فكرة عندي فكرة قوية اجي الكويت بس يومين اجي فيه الملكي ما يصير انت يعطوك بونس له في اي بوست تذكره

خلاص بموووووووت اذا ما شيشت فيه


يلا عساك عالعافية

sophisticated said...

waiiiiiiiiiiiiiiiii ya nas eyanennnnnnnn hal sbaay ;*** fdeeet asab3iik eli ketbat best cocktail ever ;** 7diik et3adel el mazaaj ..sheesha mu ricky :$ miss u

zooozy said...

OH! YOU'RE ALIIIIIIIIIIIVE!!! lol
you should change the blog's title to "Monthly posts by Ricky" srsly now |D I even thought that I jinxed you! I was like "he disappeared after you posted a comment on his blog, you jinxed the guy!" *kicks self*
*coughs* you're alive anyway! XD

uhmmmm, I have astigmatism too, I use contacts with no problems, I guess it depends on the person hmmmmmmmm YEAH *nods*

that's all I guess |D
now I'll go have dinner!
you take care Ricky! and post more often k? XP *nudges*

Anonymous said...

Grgaaa Wayed Bs 7elwa =p y36eek el3afyah ;D

Anonymous said...

hey dude

i really spent around 1 hr just readyig your posts loool and i might do one as well but bit busy keep it up very nice mmm and wish to know you more as friend

Uae moon

uaemoon@windowslive.com

اقصوصه said...

عن نفسي

اعتقد

اطول تدوينه اقراها بحياتي

والغريب بالموضوع ان الكاتب ولد

عيل ليش يقولون

ان احنا البنات ثرثارات؟

الشعب كله يثرثر

لوووووووول

بس تدوينه ممتعه

لو ماكانت ممتعه

ما كنت بكملها للاخر :)

AnGeL said...

هاي جاي بوي

دخلت عنك بالصدفة بصراحه
بس بجد دمك خفيف كتير كتير


تقبل مروري