حتى عنوان مو قادر احط لهذا البوست، اقروو وبس

اااااااه من وين ابدأ من وين ابلش يعني بصراحة موضوع اليوم تحفة من تحف الزمان

قام باضافتي منذ فترة ليست بالقصيرة، على كلامه معجب بكتاباتي، طيب كثر خيرك، المهم فترات كنا نتكلم عالماسنجر، حسب كلامه هو مرتبط منذ فترة طويلة، عمره 19 يعني مرتبط من الطفولة، المهم كنا نتكلم كأصدقاء بالماسنجر كالعادة لما ادخل ماسنجر اتكلم مع الموجودين عندي

انتوا عارفين طبعا انه هذا الماسنجر انا حاطه فقط لامور المدونة، يعني عندي حساسية من موضوع واحد يسألني عن امور خاصة فيني، للماسنجر هدف معين وهو التواصل مع اصحاب العقول

من كلامه اولها ومثل ما هو بنفسه قالي انه مايعرف شي عن كل شي، وحب اني اكون صديقه، انا بصراحة مو سهل عندي يلا اوكي صداقة مني والطريج، بس قلت ماشي ليش لا

يقولي انا ماعرف شي، نفسي اتعلم نفس الكل مثلا احط كريمات للجسم واهتم بالملابس واهتم بالمظهر وباللوك، كنت اقوله هذه امور سهلة عادي بس مايخالف اي سؤال انا حاضر

كان مصمم يتعرف علي وبنفس الوقت يقولي انا ماقدر اتعرف عالناس، مايصير اصادق مثلي لان حبيبي يمنعني من مصادقة شخص اخر، قتله اوكي، قالي بس ابي اصادقك، قتله مايخالف، قالي بس ابي اتعرف عليك بس على اساس انته مو انته، نعم؟ ايش اللي انا مو انا؟ قالي يعني اروح على اساس صدفة القهوة اللي انته تقعد فيها، وكأني اتعرف عليك من هناك، بس طول معرفتنا نسوي انه احنا مانعرف بعض وانته مش ريكي!!! انا سكت طبعا لاني مو مستوعب هالفلم الطويل والعريض وانا بصراحة يلا الطبيعيين اقدر اتعامل معاهم، وتميت ساكت وقلت طاف، ومن داخلي اقول الاخ ماشاف لما احد غريب يتكلم معاي؟ عباله علطول ارد اقول هاي اهلا؟ خصوصا لما قالي اروحلك واقولك تعال معاي برة!! نعم؟ واحد غريب يقولي تعال معاي برة؟ ردة فعلي بتكون فحمة ارميها عليه

طبعا ماراح اطول عليكم وماراح ادخل بكل التفاصيل، يومها كنت بالبحرين باخر زيارة، وصلني ايميل وقريته كان من هذا الشخص، حاطلي قائمة اسألة وعلى هالاساس تحدد صداقتنا!!! اول سؤال كان: هل انته سني ام شيعي؟ يعني من اولها سؤال مو طبيعي! ومن ضمن الاسألة ماهي علاقتك بالصلاة وكيف تنظر للهنود والوافدين (اشمعنى الهنود بالذات؟) طبعا انا عصبت ورديت على الايميل بسؤال بديهي

سألته: بعد قراءتك المستمرة لمدونتي، هل تعتقد اني من اصحاب العقلية اللي تفرق بين سني وشيعي؟؟؟؟

انا فعلا اتنرفزت من مجرد فكرة ان في شباب وخاصة في مقتبل العمر ويفرقون الناس حسب المذهب! ومن متى كانت الصداقة تعتمد على المذهب؟ كان ردي واضح اني اصلا ما اتقبل شخص عقليته تفرق بين الناس حسب المذهب، انا افرق بين الناس على العقلية، الثقافة والشخصية، وبصراحة ماقدر اتعامل مع ناس بهالعقلية، كان رده خلاص انسى الايميل واعتبر اني ما ارسلته، قلت اوكي، ادري صاير لطيف انا هالفترة :D

قررنا نتعرف على بعض وطلعنا، اوكي حسيت فعلا انه مستغرب كل شي بالدنيا، كل شيء غريب عنده، حسيت انه في شي غلط بس انا طبعي ما اتكلم وقلت اوووووكي كيفه، حتى لما وصلنا مقهى من الباب صرخ وقال (اوووه كشخة) بعدين قعدنا وكان مستغرب ليش اللي يشتغل قال في مكان للعائلات، طيب كثير كافيهات فيها اماكن للعائلات شالمشكلة؟ ترى في بنات يشيشون والله مو شيء من الفضاء

طبعا الوضع كان غريب، مع شخص عنده كل شيء غريب وممنوع ومايصير، مع شخص يستغرب حتى الاماكن العامة مع ان القهوة اللي رحناها من اسوأ المقاهي يعني نجمتين من اصل خمسة

واحنا نتكلم اخذنا الكلام عن الدسكوات والاغاني وفجأة قال بشكل يخرع: انت تشرب؟ جاوبت يس اشرب مرات لو كنت مسافر وكنت بديسكو، فجأة سكت وتغيرت الملامح ومنزل راسه وكأني قلت اني يأجوج ومستني اخوي مأجوج عشان نستولي على الكون!!! ومو اقل من ربع ساعة من هدووووء والوان على وجهه

انا بصراحة قلت ماصاااااااارت عاد لايطلع عقل ريكي، وقلت بكل هدوء خلنا نمشي تأخرنا وابي انام، وانا طبعا كنت ابي اروح الملكي اشيش وانسى يومي الاسود، قالي اقعد معاي بالسيارة شوي، قعدت وسمعني اغنية وراها قالي: انا كنت اتمنى اكون صديقك ولكن عندي مباديء وانته جربت تشرب!!!! اااااه لالا هنا كنت مصدوم، اولا انا مليون مرة كاتب بالمدونة اني جربت هالنوع او في نوع جديد جربته واني شربت مرة، يعني مثل اي بني ادم لما ادخل ديسكو اشرب، وانا مو ماسك كاس بيدي وامشي وادور فيه!!! وبعدين لو صداقة انا علي من شخصية الانسان، اما اموره الاخرى من حريته الشخصية، المهم يكون طبيعي معاي، وبعدين لو بشرب ماراح اجابالك واشرب، انا قلت لما اسافر وكنت في بار او ديسكو

وبعدين صراحة مثل ما انا ما احكم على الناس فا ما احب حد يحكم علي، يعني ليش انا ماحكمت عليه لما قالي انه كان شهر كامل في المخيم في البر مع حبيبه ومايرجع الا مرة بالاسبوع بيتهم عشان ياخذ شور!!! طيب انا كنت ممكن احكم عليه واقول كيف واحد يقعد شهر كامل بالخيم؟ اهلك مايسألوا عنك؟ وانا اللي اكبر منك ماقدر انام برة البيت، طبعا غير عن موضوع ماتاخذ شور يعني الا مرة بالاسبوع؟؟ يعني كنت ممكن احكم على اكثر من شيء قاله، بس انا طبعي ما احكم الا على شخصية الانسان معاي

طبعا انا ماقلت كل هالكلام، بس قلت عادي مافيها شي وخصوصا انته اللي حنيت على هالصداقة، وتمنيت عليه انه يحاول شوي يطلع من القفص اللي حاط نفسه فيه ويحاول يحتك بالمحيط اللي هو فيه احسن لنفسه عشان لايكبر ويشوف العالم كله غريب

قال "فوفو" غفر الله له**: الا وانك انت المخطيء، الم تعلم ان مجرد سؤاله عن مذهبك يثبت عقليته من البداية، ومع كل هذه التناقضات اللي يضع نفسه بها، الم تعلم انها صداقة عقيمة من البداية؟ ومع هذا سيجدك انته الغريب فقط لانك انسان طبيعي، ولا اعلم كيف انك لاتتعرف على احد بسهولة ولكن اعطيته مجال ليصادقك؟ قلت كسر خاطري، قال: تستاهل

**فوفو عارف نفسه مين :)
**جملة (قال..غفر الله له) هي جملة يستخدمها الكاتب الرائع والاعلامي المتميز تركي الدخيل، ومن شدة حبي واعجابي بهذا الكاتب العملاق اقتبست الجمله منه مع تصرف، شسوي يابوعبدالله من زود المحبة :)