Sunday, October 5, 2008

كوكتيل العيد



كل عام وانتو بخير

حبيت اشارككم اليوم ببعض طقوس العيد اللي تصير في عائلتنا، بعيد الفطر من كل سنة العمة تزورنا بالكويت وتقضي معانا رمضان والعيد، العمة سيدة سعودية تقليدية لكن مو تقليدية بالمعنى المعروف، صحيح انها كبيرة بالسن لكن واصلة لاعلى مراحل التعليم وبنفس الوقت ياويكلم لو تلمحو اماما مجرد تلميح انها كبيرة، هي بنظرها الى الان شابة وفي مقتبل العمر كمان! واللي يعجبني فيها انها الى الان تستمتع بالحياة بكل لحظة فيها

طبعا العمة بالعيد من اول الناس اللي تعطيني العيدية، واللي استغرب منه انه عيديتها دائما تكون بالعملة السعودية، حتى لو كنا في اخر بقعة من كوكب الارض لازم تعطينا العيدية بالعملة السعودية وصار هالشي تقليد سنوي، حتى بالعيدية محافظة على تقاليدها

اذا كانت عمتي حاضرة انسى انك تنتقد السعودية ولا حتى بكلمة لانك وراها راح تسمع محاضرة طويلة عريضة لازم تنتهي بأنك غلطان لان العمة مستحيل تطلع غلطانة بشي

نخلص من تقليد العمة وبروتوكولها ونروح للخدامة، طبعا الخدامة مش مسلمة لكن احنا مانهتم للاديان ونتشارك دائما بكل المناسبات الانسانية، الخدامة مستحيل تقولي عيدك مبارك طالما اني للحين ماعيدت على امي وابوي، متعود دائما انها تبارك بالعيد لكن في احدى المرات شفتها ماعبرتني، والسبب كانوا اهلي نايمين ولازم ماتبارك لحد في العيد الا اذا كل اهل البيت تبادلوا التهاني، الاخت حاطه لنفسها بروتوكول بس صراحة بروتوكول حلو

في العيد انا غالبا اكون مواصل، واتم مواصل لحد ما ابارك بالعيد واتبادل التهاني (والاهم اخذ العيدية) من اهل البيت وبعدين اروح انام تقريبا الظهر، احسن لان من بعد الظهر يصير تبادل الزيارات وانا اكره المناسبات وتبادل الزيارات وماحب ازور احد واكره الرسميات

ابوي حلم حياته يشوفني لابس الدشداشة (الزي التقليدي) وطبعا انا اكره الدشداشة واقول دائما مستحيل البس خيمة وامشي فيها، اوكي لاتزعلو احب اشوفها عليكم بس انا ما البسها يعني حل عني

امي حبيبتي من وانا صغير دائما تكون حريصة محد يكون زعلان بالعيد، دائما تمحي اي اثر للزعل ايام العيد، كنت احب هالاحساس وكنت اتعمد اسوي نفسي زعلان او متضايق عشان اشوفها تشيل مني الزعل بأسلوبها الحلو، تعودنا ان الزعل ممنوع بالعيد

اخوي ومرت اخوي عندهم العيد مناسبة مزعجة لانهم مضطرين يجاملو الناس ويلتقوا فيهم ايام العيد

اختي وعيالها الصغار الحلوين دائما مناسباتهم شيقة وحلوة واحب اشوف شنو يسوون، من قرقيعان وحفلة القرقيعان العائلية الى العيد وطقوس العيد، شابة خليجية محافظة على التقاليد القديمة وتحب تعيش هالتقاليد بأسلوب عصري

بعيد الخروف (عيد الاضحى) من كل سنة ابوي وامي لازم يقضون العيد في مدينة الخبر بالسعودية عند العمة، انا ما اروح معاهم بس عيد الخروف الماضي رحت لان الرشوة كانت كبيرة ومغرية لدرجة اني ماقاومت، رحت وقضيت اغلب الوقت بكورنيش الخبر وفي البحرين (البحرين قريبة من الخبر ويربط بينهم جسر)
وطبعا اكيد صارتلي مغامرات كثيرة راح اكتبها مع الايام، والحلو ان الاهل هناك عبالهم اني رايح بكيفي لاني مشتاق ومش عارف ايش، مايدرون ماخذ رشوة عشان اروح

انا عن نفسي ما ابارك لحد بالعيد او رمضان لسبب بسيط، انها تصير كل سنة طيب ليش نعيد نفس الكلام؟ خلاص مو شي جديد

بس الاهم عندي اني استلم عيديتي، وانا الحين ناطر منكم عيدية، اللي بالكويت يعطيني اياها الحين واللي بره الكويت راح ارسلكم رقم حسابي يعني مافي عذر :p

11 comments:

Unbreakable said...

(1)
كل عام وأنت والأهل والأقارب والأصدقاء بخير وعافيه وبأفضل حال .، وينعاد عليكم بالخير يارب .

في البدايه الله يخلي لكم العمه ولمن يعزها ويعز عليها .، وأحسن شي يكون الإنسان عايش حياته لحظه بلحظه ويستمتع فيها .

اما معايدتها بالريال فأعتبر هذا ذكاء حِسابي .، يعني بدل ماتعطيك 50 دينار (700 ريال تقريباً) تخليها 500 ريال وتوفر الباقي هههههههههه امزح امزح بس انتبه لا تزعلها وتنتقد السعوديه :p على فكره ترى أكثر الجيل القديم كذا ، عندهم ولاء كبير ولا يرضون احد يتكلم في هالأمر! :d .
اما بالنسبه للخدامه دام هي مو مسلمه ليش ماتعطيها العيديه عشان تحس بطعم العيد معكم ويمكن تسلم ، ولا.... طامع فيها بعد ههههههههههههههههه بس بروتوكولها مره رسبكت :d

و والدتك الله يحفظها ويخليها لكم ، من جد تصرفها مضبوط لأنه المفروض الواحد يطنش كل شي يضايقه ويستمتع بالعيد ويفردها شوي يطلع ويقابل احبابه.، لاحقين على الهم ياخوي .

والمره الجايه إذا جيت الخبر نبي نشوفك :d

والعيديـه ابشربها بس مو الحين إذا استملت المكافئه هههههههههههههههههههه

مابي أطول أكثر :d
لك كل الحب والإحترااامـ
(f)

"Gay Boy" Weekly said...

Unbreakable
تعبتني معاك كل يوم تغير النك، صرت تغيره مثل ما اغير ارقامي بالضبط :P

مشكور عالكلام الحلو وذوقك العالي اللي عودتني عليه

بالنسبة للعمة لا حرام ظلمتها، لان العيدية زادت بسبب انخفاض قيمة الريال يعني هالشي ماطافني هههههههه

اما الخدامة كل عيد لازم اعيدها، بأعيادنا واعيادها دائما كل البيت بمن فيهم انا نعيدها، بسك ظلم ترى والله انا زين وشاطر، صج شيطان وعنيد وشوي بس شوي مينون بس والله خوش واحد :D

خلاص ولايهمك خش المكافئة عشان لمن اروح الخبر بالعيد الكبير اخذ عيديتين، الفطر بأثر رجعي وعيد الخروف لاني بكون هناك... هاهاها شنو هالشوفة اللي بتفلسك، لا يبه شوفتك احلى عيدية

ولاتقول مابي اطول عليك، انت تعرف غلاتك وطول مثل ماتبي

تحياتي الحارة لك

saudi narces said...

ريكي انا اول شي عمتك هذي اوقف واضرب لها تحيه ... انا احترم كل واحد وطني ويحب بلده حتى لو كانت مليئه بالعيوب ... ويمكن السبب الي يخليها تعطيكم العيديه بالريال ومو بعمله ثانيه لانه يمكن هالشي يذكرها بذكريات حلوه يعني لما كانو يعيدون عليها بنفس العمله فهي تحس انك انت بتحس بنفس السعاده الي هي كانت تحس فيها لما كانت تاخذ عيديتها بالريال
المهم الله يطول لكم بعرمها ويكثر خيرها عشان تزيد عيديتك p:

واختك احب فيها احترامها للعادات والتقاليد وشلون تحولها من اشياء ممله الى اشياء مفرحه بطريقة حلوه


اما انت ما تبارك لاحد بالعيد او رمضان لانها تصير بكل سنه فهذا يا حبيب ألبي مو سبب مقنع ابدا لانه كل شي يصير كل سنه مثل ليلة السنه الجديده والكريسماس وعبد الحب وغيرهم من الاشياء تصير كل سنه وبالعكس حلو ان الواحد يحس فيهم
لانها صح هي تصير كل سنه بس لا تنسى انها مره كل سنه
مو كل شهر او اسبوع


آآآآ .. مين يبي عيديه ؟؟ ....
انا ما عندي حساب بالبنك ....

karim said...

مرحبا صديقي أعجبني موضوعك الحلو والخفيف هذا...ما أجمل الاحتفال بالعيد رفقة العائلة...لكن فيما يخصني أنا...فأمل سريعا من العائلة والدوشة اللي بتصير...فأخرج سريعا رفقة الأصدقاء وفي أغلب الأحيان نسافر الى مدينة أخرى...لنغير الجو ونتفسح

أما بخصوص العيدية...فلك مني من هنا من المغرب مائة ألف تحية

"Gay Boy" Weekly said...

saudi narces

اهلا اهلا، بخصوصا التهنئة لاتحاتي انا اهتم بكل المناسبات، بس الا رمضان وعيد المشروم وعيد الخروف مادري ماحب، يمكن لاني اشوف كل الناس بهاليوم ترسل مليون مسج فا انا ابطل، ومليون شي يوصلي يخلوني امل من اولها

مالي شغل اذا ماعندك حساب، المهم انا عندي ويلا دز العيدية :P

"Gay Boy" Weekly said...

karim

اهلا بك صديقي العزيز

انا نفسك امل بسرعة من ازعاج العائلة والزيارات، لكن هروبي هو الى النوم، انام قبل ان يبدأ الازعاج بدقائق واقوم من النوم بعد ماتنتهي

لاني ايضا لا اخرج اول ايام العيد بسبب الزحمة الخانقة

تحياتي لك وشكرا على مشاركاتك الرائعة دائما

اجندا حمرا said...

مرسي ياخالد انك شاركتنا بذكريات العيد
كل سنه و انت و كل اسرتك بخير و اسمحلي احييك علي اغنيه بتونس بيك عشان انا بحب الأغنيه دي اوي

"Gay Boy" Weekly said...

اجندا حمرا

كل عام وانتي بألف خير

وكويس انك تحبي الاغنية :) وانا احبها كثير

انا احس بسعادة لما اشارك اللي احبهم كل شيء في حياتي

يارب ايامك كلها افراح واعياد

knight said...

أدري متأخر
but better late then never :P
عيدك مبارك و كل عام و انت بخير
تبيني أعايدك؟ البس الدشداشة و راح أعايدك:P
انا قضيت العيد و يا الاهل بالكويت
والله استانست و غيرت جو شوي
طبعا رديت الامارات بعدها بسرعة

"Gay Boy" Weekly said...

knight
هلا فيك :) وكل عام وانت بخير

وانا اقووول الكويت منورة بس ماكنت اعرف السبب ;)

ماراح البس دشداشة وراح اخذ العيدية... كيفي :P

بس ليش رديت بسرعة؟ يلا المهم تكون استانست وهذا اهم شي

بهاء said...

مساء الخير
أنا باهو من مصر سعيد جداً بتعليقي على هذه المدونة الرائعة أرجو زيارة مدونتي وإضافتى لديكم بالفضلة كما قمت بإضافتكم
http://onedifferent.blogspot.com/