Sunday, October 19, 2008

محاضرة غير شكل



هالمادة جزأ ثاني، يعني كل جزأ في كورس، والمفروض انه نفس الطلبة اللي بالجزأ الاول يكونون موجودين بنفس السكشن بالجزأ الثاني، طبعا ممكن انك تغير بس غالبا بنفس السكشن يعني المفروض اشكالهم مارة علي بس مشكلتي الازلية اني ما اطالع احد وما اصدق اني اطلع من المحاضرة بدون لا اكلم اي كائن حي داخل الجامعة، وبأسوأ الاحوال هاي باي وخلاص

كنت قاعد بالمحاضرة وكعادتي الكريمة اول واحد يدخل واول واحد يطلع، المهم الطلبة يستمرون بالدخول ثم دخل شخص وحسيت عيوني اطلعت من مكانها، هالطالب زبون دائم في تشي تشي، مكاني المفضل والمعتاد للشيشة، كان دايما يعجبني بشكله وشخصيته وتصرفاته وحتى ضحكته وكلامه وهدوئه الغريب مع اني ما اميل كثير للهدوء

وكنت مستانس انه معاي بالمحاضرة وتوني اكتشف طبعا انه معاي بالمحاضرة لاني واخيرا قررت ابدأ اشوف الناس واحس انه فعلا في كائنات اخرى بالجامعة مو بس انا هاها

نسيته شوي لما كان دكتور آخر، وهو منسق المادة، يكلمنا عن دكتورنا والمشكلة اللي صارت انه ماكان يعطينا الدروس صح وكان بس مجرد ياخذ راتبه ويطلع وكان يهمل تقاريرنا وان الجامعة استغنت عن خدماته وراح تكون في لجنة خاصة لاعادة رصد درجات السكشن وطبعا الكل كان مصدوم مع سماع هذه الاخبار، بس عادي اصلا انا خبصت في اختبار الجزأ الاول من هالمادة يعني ماراح تفرق معاي

مع مرور نصف المحاضرة، عطانا الدكتور بريك لمدة 10 دقايق، واحد نط وسألني عن شعري وقالي ليش غيرت اللوك وشكلي كله تغير ومش عارف ايش يعني الاخ مهتم مثلا بشعري؟؟ التفت ولقيت الشاب اللطيف من تشي تشي مندمج معانا بالموضوع، طبعا قررت اني ولو لمرة وحدة بحياتي ابلش اصير لطيف شوي واتكلم حتى مع شخص ماعرفه، تكلمنا بمواضيع مختلفة والحمدلله اللي معجب فيه شاركني بنفس الرأي انه الواحد مفروض يشتغل لوحده بالتقارير لانك لو كنت بقروب راح تكون صعبة وخصوصا في ناس مزعجة خلقة من الله وصعب التواصل معاهم

وهو يتكلم حاولت اطلع فيه عيب، اي عيب لكن ماقدرت، كل شي فيه حلو، يعني اول كان بتشي تشي بس اما الحين تشي تشي والجامعة وبنفس المحاضرة، اعتقد صار الموضوع اووووفر هاها بس عالاقل صار عندي سبب اني التزم بمحاضرات هالمادة :)

الاخ الغبي اللي يناديه الدكتور "الايطالي" عشان ستايله اللي نفس لاعبي منتخب ايطاليا، مادري من وين طلعلي، اوكي صح انه ايضا شكله حلو بس دخل غلط عالخط، دخل متأخر المحاضرة ومن بين المليون كرسي الفاضي ما اختار الا ان يجلس لجانبي مادري ليش؟ مع مرور ورقة الغياب المفروض انا اللي اقوم اخذها الحين من اللي امامي لانه اقربلي لكن الايطالي نط وقام اخذها بالنيابة عني، كتب اسمه وايميله وعطاني الورقة، طبعا احسن كانت خيرة عشان لما انا اخلص اقوم اعطيها للشاب اللطيف من تشي تشي، لكن بعد ماخلصت الايطالي قالي ممكن تعطيني الورقة ابي اتأكد اني كاتب ايميلي صح!!! اف ياربي من وين طلعلي هالعلة؟ وطبعا اهو عطاه اياها

الشاب من تشي تشي شفته قايم ويبي يعطيني الورقة على اساس اني مو كاتب، ولا الاخ الايطالي يتبرع ويرد عليه يقوله "احنا" كتبنا وخلصنا، ويأشر علي انا وياه، اولا منو سمحلك ترد؟ ثانيا ليش تتكلم بالنيابة عني؟ حسسني انه حبيبي ويغار علي؟ ويعة

كانت محاضرة غريبة بس اللي انا متأكد منه اني ماراح اطوف منها ولا محاضرة :)

9 comments:

ElvisFan (h) said...

ودي اعرف وش يحس فيه هالأيطالي هههههههههههههههه
طيبه ولا غباء ولا لقافه ولا كلهم مجتمعين!
:d

صراحه بنظرتي الشخصيه حسيت انه معجب فيك وحبك.. نعم حبك ليش لا!
السالفه واضحه الولد ذابح نفسه عشان ترتاح! يقوم يجيب لك الورقه ويتكلم عنك بالنيابه يعني صدقني حبووب مايبيك تتعب من زود اعجابه وحبه .
:P

هههههههههههههههههههههه

وحلو ان يكون معاك زميل في الكلاس "وايضاً زميل في تشي تشي" يحفزك على الحضور والإنتظام :D
وإن شاء الله ماده ممتعه ومفيده.. وعلاقه جديده :$

وبالتوفيق إن شاء الله

"Gay Boy" Weekly said...

ElvisFan

لا صدقني لقافة مع غباء، خلطة سحرية يتمتع فيها، ياربي يومها كنت شوي بس شوي واقتله، وجوده كان بالوقت والغلط وحركاته العبيطة خربت كل شي

من ناحية التزام بالمحاضرة صدقني التزام بمعنى الكلمة ولا ارح اطوف اي محاضرة :P

بس علاقة جديدة لا هذه صعبة :) انا مع الواضحين تكون العلاقة صعبة، شلون عاد واحد ماعرف عنه شي ولا حتى صداقة جامعية، لا انا مو حاط ببالي شي ابدا بس مجرد صدفة حلوة مريت فيها وخلاص مو اكثر

Shams Al-Ma7aba said...

وااااو يابختك وبالمحاضرة بعد علاقه حب بالجامعه ههههههههه

انا ويا حبيبي بالمحاضرة عااادي مااشوف غيره :$:$ خخخخخخخخخخ

يلا عقبالك عشان نحرّ بعض مو تنسى ههههههههه


حلاته يغيرون لنا الدكتور الي يقرى بس ومايشرح مادة حلوة كلها اشياء مثيرة للجدل تحتاج دكتور يعيشنا الجو ههههههههههه


حلوو بوستك يهبل تكتب من قلب

باااايز

"Gay Boy" Weekly said...

Shams Al-Ma7aba

هلا فيك عزيزي، عاد مادري شنو بصير بعدين بس انا اعتبرها صدفة حلوة وخلاص مو حاط امل احس الموضوع صعب شوي

احنا نفس الشي كان يقرا بس والمشكلة محد فينا تكلم والمنسق لامنا وقال مفروض كنتو تشتكون من اول، بس اشوة راح بعد مابهدلنا

يلا نصير نحر بعض ليش لا بس انطرني ليما ارسى على بر هههههههه

مشكور على كلامك وذوقك الحلو وتحياتي لك ولحبيبك

saudi narces said...

واو عاد تخيل انت وهذا الحلو والايطالي بغرفه وحده اوكي orgy
من جد فله
ومن جد على قولتك
i need to get laid :S :S


بس لازم توقعه بشباكك وعلى طول قولنا بالمستجدات


اكيد انت هذا الي جالس بالكرسي الاول ولابس قميص ابيض باين من ملامح الوجه انه انت عاد لازم تبدا تتعلم شلون تروق بالجامعه

مثلي اماراتي said...

احب اقرا الباقي قصة حلوه واتمنى لك تحصل الي تتمناه

نزلت الجزء السابع من بحثي

"Gay Boy" Weekly said...

saudi narces

اهو من ناحية فلة اللي تقوله فعلا فلة وابو الفلة وفلة ونص هههههه

بس هم اعيد واقولها You need to get laid hun :P

ههههههه يعني عشان ابو قميص ابيض عصبي؟؟ لالا تطورت وصرت اسلم لمن ادش المحاضرة صرت اقولهم صباح الخير يعني تطورت وايد لاتحاتي :P

"Gay Boy" Weekly said...

مثلي اماراتي

يسلمو يالغالي كلك ذوق

مشكور انك قلتلي وراح اقراه الحين

يعطيك العافية

Alex ! said...

ههههههههههه

مسكين هالايطالي

شكله فعلا غرقان عندك

عطه فرصة يمكن يستاهل

بالنسبة لي

حبيبي هو معلمي في الكلاس

يعني بكل مكان اشوفه

بس هو اللي قلبه قاسي


مايبي يعترف بحبه

تشااااااااااااااااو