محاضرة غير شكل

هالمادة جزأ ثاني، يعني كل جزأ في كورس، والمفروض انه نفس الطلبة اللي بالجزأ الاول يكونون موجودين بنفس السكشن بالجزأ الثاني، طبعا ممكن انك تغير بس غالبا بنفس السكشن يعني المفروض اشكالهم مارة علي بس مشكلتي الازلية اني ما اطالع احد وما اصدق اني اطلع من المحاضرة بدون لا اكلم اي كائن حي داخل الجامعة، وبأسوأ الاحوال هاي باي وخلاص

كنت قاعد بالمحاضرة وكعادتي الكريمة اول واحد يدخل واول واحد يطلع، المهم الطلبة يستمرون بالدخول ثم دخل شخص وحسيت عيوني اطلعت من مكانها، هالطالب زبون دائم في تشي تشي، مكاني المفضل والمعتاد للشيشة، كان دايما يعجبني بشكله وشخصيته وتصرفاته وحتى ضحكته وكلامه وهدوئه الغريب مع اني ما اميل كثير للهدوء

وكنت مستانس انه معاي بالمحاضرة وتوني اكتشف طبعا انه معاي بالمحاضرة لاني واخيرا قررت ابدأ اشوف الناس واحس انه فعلا في كائنات اخرى بالجامعة مو بس انا هاها

نسيته شوي لما كان دكتور آخر، وهو منسق المادة، يكلمنا عن دكتورنا والمشكلة اللي صارت انه ماكان يعطينا الدروس صح وكان بس مجرد ياخذ راتبه ويطلع وكان يهمل تقاريرنا وان الجامعة استغنت عن خدماته وراح تكون في لجنة خاصة لاعادة رصد درجات السكشن وطبعا الكل كان مصدوم مع سماع هذه الاخبار، بس عادي اصلا انا خبصت في اختبار الجزأ الاول من هالمادة يعني ماراح تفرق معاي

مع مرور نصف المحاضرة، عطانا الدكتور بريك لمدة 10 دقايق، واحد نط وسألني عن شعري وقالي ليش غيرت اللوك وشكلي كله تغير ومش عارف ايش يعني الاخ مهتم مثلا بشعري؟؟ التفت ولقيت الشاب اللطيف من تشي تشي مندمج معانا بالموضوع، طبعا قررت اني ولو لمرة وحدة بحياتي ابلش اصير لطيف شوي واتكلم حتى مع شخص ماعرفه، تكلمنا بمواضيع مختلفة والحمدلله اللي معجب فيه شاركني بنفس الرأي انه الواحد مفروض يشتغل لوحده بالتقارير لانك لو كنت بقروب راح تكون صعبة وخصوصا في ناس مزعجة خلقة من الله وصعب التواصل معاهم

وهو يتكلم حاولت اطلع فيه عيب، اي عيب لكن ماقدرت، كل شي فيه حلو، يعني اول كان بتشي تشي بس اما الحين تشي تشي والجامعة وبنفس المحاضرة، اعتقد صار الموضوع اووووفر هاها بس عالاقل صار عندي سبب اني التزم بمحاضرات هالمادة :)

الاخ الغبي اللي يناديه الدكتور "الايطالي" عشان ستايله اللي نفس لاعبي منتخب ايطاليا، مادري من وين طلعلي، اوكي صح انه ايضا شكله حلو بس دخل غلط عالخط، دخل متأخر المحاضرة ومن بين المليون كرسي الفاضي ما اختار الا ان يجلس لجانبي مادري ليش؟ مع مرور ورقة الغياب المفروض انا اللي اقوم اخذها الحين من اللي امامي لانه اقربلي لكن الايطالي نط وقام اخذها بالنيابة عني، كتب اسمه وايميله وعطاني الورقة، طبعا احسن كانت خيرة عشان لما انا اخلص اقوم اعطيها للشاب اللطيف من تشي تشي، لكن بعد ماخلصت الايطالي قالي ممكن تعطيني الورقة ابي اتأكد اني كاتب ايميلي صح!!! اف ياربي من وين طلعلي هالعلة؟ وطبعا اهو عطاه اياها

الشاب من تشي تشي شفته قايم ويبي يعطيني الورقة على اساس اني مو كاتب، ولا الاخ الايطالي يتبرع ويرد عليه يقوله "احنا" كتبنا وخلصنا، ويأشر علي انا وياه، اولا منو سمحلك ترد؟ ثانيا ليش تتكلم بالنيابة عني؟ حسسني انه حبيبي ويغار علي؟ ويعة

كانت محاضرة غريبة بس اللي انا متأكد منه اني ماراح اطوف منها ولا محاضرة :)