أول مرة

فترة انقطاعي الاخيرة عن الكتابة كانت لاكثر من سبب، لكن اللي استغربت منه هو اغلبها اسباب لاول مرة تحصل لي

أول مرة بحياتي اشتغل، بعد ماخلصت امتحانات نهاية الكورس دخلت تدريب صيفي لمدة شهرين في احدى الشركات، وايضا كانت اول مرة استلم فيها راتب، اول مرة اقول كلمة راتب وليس مصروف

اول مرة في هالفترة اسوي حادث سيارة بمعنى الكلمة، دائما اضرب الرصيف واطلع فوق الدوار لكن هذه المرة كان حادث طبيعي، واول مرة ما اكون انا الغلطان

اول مرة ادخل فيها مخفر شرطة عشان اطلع شيء اسمه "ورقة حادث" وهي ورقة تسمح لي بتصليح سيارتي، طبعا ياما دعمت وماكنت اعرف اني لازم اطلع ورقة حادث

انا فيني عقدة مع السيارات... كل شيء جماد في الدنيا يحب سيارتي، الارصفة تحب سيارتي وتصدم بها، المسامير تحب سيارتي وتسببلي بنشر، حتى سيارات الناس تحب سيارتي وتدعمها

وطبعا انا انسان لا افهم شيء في السيارات، كل اللي اعرفه كيف اقود سيارتي فقط

في بداية قيادتي للسيارة، بالاشهر الاولى، وانا في طريق العودة للمنزل بعد منتصف الليل توقفت سيارتي في منتصف الطريق، وروائح غريبة واشياء تخرع

طبعا وديتها في كرين للبيت وثاني يوم سلمتها لابي، جائني في المساء وسألني: بابا انت متى آخر مرة غيرت فيها زيت السيارة؟

انا: نعم؟

ابي: متى غيرت زيت السيارة؟

انا: هل يوجد بالسيارة شيء اسمه زيت؟

ابي: سكووووووووووت ونظرة غريبة بدون اي كلمة

انا: هي مو تمشي عالبنزين؟

ابي: خلاص خلاص

وطبعا من يومها عرفت ان هناك شيء اسمه زيت سيارة ولازم يتغير بعد ما ضربت الماكينة :)

محد قالي من قبل يعني لحد يلومني رجاءا

للاسف الى الان اخي وكل اصدقائي يذكروني بالموضوع ويضحكوا علي :(